IRAN TA GARGADI MA’AIKATAN KAMFANONIN AMURKA SU BAR GABAS TA TSAKIYA ‎

‎Iran ta fitar da wani muhimmin gargadi ga ma’aikatan kamfanonin Amurka da ke aiki a yankin Gabas ta Tsakiya, inda ta bukace su da su gaggauta barin yankin domin kare rayukansu. Wannan sanarwa ta zo ne a wani lokaci da rikicin yankin ke kara tsananta, abin da ke janyo fargaba a duniya.

‎

‎A cewar sanarwar, Iran ta bayyana cewa wani aiki na musamman zai fara a ranar Laraba, 1 ga Afrilu, da ƙarfe 8:00 na dare agogon Iran. Wannan ya sa mutane da dama ke cikin damuwa, musamman waɗanda ke da alaƙa da kamfanonin kasashen waje a yankin.

‎

‎Iran ta kuma jaddada cewa duk wani kamfani da ke da hannu kai tsaye ko a kaikaice a abin da ta kira “shirye-shiryen ta’addanci” zai fuskanci martani mai tsauri. Ta bayyana cewa duk wani hari da aka kai zai haifar da ramuwar gayya daga bangarenta.

‎

‎Jerin kamfanonin da aka ambata sun haɗa da manyan kamfanonin duniya kamar Meta, Apple, Microsoft, Google, Intel, Cisco, Boeing, Oracle, IBM, Dell, Nvidia da sauran su.

‎

‎Wannan mataki na Iran na nuni da wani sabon salo na tsauraran matakai a rikicin yankin, wanda zai iya kara dagula al’amura da tasiri ga tattalin arzikin duniya da tsaron yankuna. Yanzu haka, idon duniya na kan abin da zai biyo baya a kwanaki masu zuwa.